Frantzian Pascalek pascalina sortu zuen bitartean, Alemanian, aldi berean, Wilhelm Schickard matematikariak erloju kalkulagailua asmatu zuen. 1623ko eskutitz batean, Schickardek honela idatzi zion bere adiskide Kepler astronomoari: “Zuk eskuzko kalkuluarekin egiten duzun hori bera egiten saiatu naiz ni duela gutxi, baina mekanikoki. Makina bat egin dut, eta emandako zenbakiak berehala eta automatikoki zenbatzeko, batzeko, biderkatzeko eta zatitzeko gai da. Ziur nago pozez lehertuko zarela ikusten duzunean nola eramaten duen hamarrekoetatik edo ehunekoetatik bururako gordetzen dena, edo nola kentzen duen kenketetan”.
Ikusi Zientziaren Museoan

Pascal gazte-gazteak, aita estimu handian zeukanez, lehen batuketa makina mekanikoa asmatu zuen, pascalina izenekoa. Esteban Pascal Normandiako zerga-biltzaileak egunak eta egunak ematen zituen kalkulu bukaezinak egiten, eta bere seme Blaisek, aitaren lanaldiak arintzeko, kalkulu makina bat asmatu zuen. Hainbat urtez doikuntzak egiten ibili ondoren, pascalina amaitutzat jo zuen 1642an.

Kalkulagailuak hobetzeko eman zen hurrengo urrats handia Gottfried Wilheim Leibnizen eskutik etorri zen. 1670ean, Liebnizek pascalina hobetu zuen, biderkatzeko, zatitzeko eta erro kubikoa egiteko gaitasunak erantsi baitzizkion. 1679an, sistema aritmetiko bitarra sortu eta aurkeztu zuen: 0 eta 1 zenbakietan oinarrituta zegoen, eta, mende batzuen buruan, ordenagailu modernoen hizkuntza estandarizatzeko balioko zuen.

Aritmometroa ere Liebnizen makinan oinarritu zen, baina neurri handi batean hobetu zuen, ehuneko ehuneko fidagarritasuna lortzera iristeraino. Aritmometroak etapa erabakigarria eragin zuen kalkulu mekanikoaren historian, hura izan baitzen munduan eskala handian merkaturatu zen lehen kalkulagailua.
Ikusi Zientziaren Museoan

Willgodt-Theophil Odhner suediar ingeniaria ere Liebnizen makinan inspiratu zen, eta horzdun gurpileko mahai gaineko kalkulagailu bat sortu zuen. Fabrikazio industriala 1874an hasi zen, eta ia mende batez luzatu zen, etenik gabe, 1972ra arte.
Ikusi Zientziaren Museoan

Franz Trinks alemaniar ingeniariak Odhner makinen patentearen esleipena lortu zuen Alemania, Belgika eta Suitzarako, eta Brunsviga markarekin industrializatu zituen. 1957ra arte, 500.000 makina baino gehiago egin ziren, eta, 1955ean, mila pertsonak baino gehiagok egiten zuten lan bere instalazioetan.
Ikusi Zientziaren Museoan

Curt Herzsatark austriarra Buchenwald kontzentrazio esparrura deportatu zuten Bigarren Mundu Gerran, eta, bertan, fabrika batera bidali zuten, kalkulagailu bat asma eta gara zezan, Hitlerrentzako gerra bukaerako oparia izan zedin. Guda amaitu zenean, Herzsatark hutsetik abiatu zen berriz ere diseinuarekin, eta 1947an merkaturatu zuen kalkulagailua. Curta izenekoa merkatuko kalkulagailu eramangarririk onentzat jotzen zen, eta kalkulagailu elektronikoen etorrerak baizik ez zuen ordezkatu.
Ikusi Zientziaren Museoan

Kalkulagailu elektronikoek aurreko guztiak ordezkatu baino lehen, Odhner, Brunsviga eta bestelako ereduek azken garapen bat bizi zuten: abiadura handitzeko motor bat akoplatu zitzaien. Are gehiago, batzuek inprimagailua zeukaten, Olivetti Divisumma izenekoak, esaterako.

Sumlock ingeles konpainiak sortu zuen 1961ean, eta mekanikoek egiten zituzten eragiketa berak egiten zituen, baina askoz azkarrago, isilik eta zirkuitu integratuen bidez. Emaitza hodi katodikoz osatutako argizko pantaila batean agertzen zen. Anitak kalkulagailu mekanikoen bukaeraren hasiera ekarri zuen berekin.